Hoxe, despois de 1 ano e 4 meses de traballo, temos o pracer de anunciar a versión de escritorio do Xfce 4.10, unha nova versión estábel que substitúe ao Xfce 4.8.

No ciclo 4.10 centrámonos principalmente en pulir o escritorio e mellorar a experiencia do usuario de varias maneiras. Os máis destacado desta versión é:

• Un buscador de aplicacións novo que foi completamente reescrito e combina a funcionalidade do antigo «xfce4-appfinder« e «xfrun4».
• O panel agora ten un modo de visualización vertical alternativo (unha barra de escritorio). Ademais, os engadidos de panel poden ser organizados en varias filas, o que é particularmente útil no modo de barra de escritorio.
• Un novo editor de tipo MIME que permite mudar doadamente as aplicacións empregadas para abrir diferentes tipos de ficheiros. O diálogo de configuración do rato e da área táctil así como o editor de opcións estendéronse en función da funcionalidade. O primeiro agora admite tabletas dun xeito moito mellor.
• Agora pode iniciar aplicacións e abrir ficheiros no escritorio cun só clic do rato. Ademais, o escritorio 4.10 pode amosar miniaturas e avanzar automaticamente pola lista de fondos.
• O xestor de xanelas pode configurarse para axustar a mosaico as xanelas ao arrastralas aos bordos da pantalla. A xanela de lapelas (Alt Tab) admite maior flexibilidade en temas de navegación e navegación coas frechas do teclado.

Pode facer unha visita para ver os cambios do Xfce 4.10 aquí:

https://xfce.org/about/tour

Na seguinte páxina pode atopar unha visión detallada dos cambios comparando a versión do Xfce 4.8 coa versión preliminar do Xfce 4.10:

https://xfce.org/download/changelogs

Esta versión pode descargarse como un conxunto de paquetes individuais ou como un único e grande ficheiro comprimido que inclúe todas estas versións individuais:

http://archive.xfce.org/xfce/4.10

Grazas a todos os contribuidores, aos informadores de fallos, así como aos tradutores e empaquetadores polos seus esforzos para facer posíbel esta versión.

Saúdos.
O equipo de desenvolvemento de Xfce.